ЛеБрон эр хүн

ЛеБрон Жэймс ямар ч байсан гонгиносонгүй эр хүн шиг байж, нэгдүгээр тоглолтондоо ялалт байгууллаа. Вашингтон Визардс-ын тоглогчид мань эрийг уул нь арай л дэндүүлсэн л дээ. Кливленд Кавалиерсийн хожсон энэ тоглолтод өрсөлдөгч багийнхан нь бүгд л Кинг Жэймс рүү дайрч, бараг бүгд нэг нэг монжиж авсан. Эхлээд Андрэй Блачэ Жэймсийн нүүрэн дундуур буулгаад авдаг байнашдээ. Тэгээд л эхэлсэн дээ. Гар, хөлөөрөө цохиод л, цавчаад л... Нэг удаа Брэндан Хэйвүүд Жэймсийг унагачихаад бүүр давраад дээр нь таахалзан зогсоод байхаар нь Жэймс босч ирж шөргөөцөлдөөд авсан гэжугаа. Ингээд мань хоёр хоёулаа техник авах болзлоо хангаад байжийтал Вашингтоны Жамисон сандарч гүйж ирээд бас техник авчихсан. Кливлендийн Биг Бен, Биг Зи хоёр харин арайчүү амьсгаадсаар сүүлд ирсэн чинь шүүгч нь техникээ харамлаад новширсон гэжугаа.

Гэсэн ч НБА-г оноогоор тэргүүлэгч Жэймс ямар ч байсан 32 оноо авч, сүүлийн минут хагасын хугацаанд 2 бөмбөг хийсэн нь Визардсыг бүрмөсөн бутниргэлээ.

Визардс сүүлийн гурван жилийн турш Кливлендтэй плэйоффын эхний үед таарчихаад байгаа юм. Ноднин, уржнан хоёр Визардс хусуулаагүй юү тэгээд.

Жэймс өчнөөн төчнөөн монжуулснаа юман чинээ бодохгүй "Өө яахав. Хэд цохиулахад яахав дээ. Жэймс дээр алдаа гаргах нь зүгээр алдаанаас шаал өөр. Намайг бүүр шалчийлгах зорилготой алдаа хийдэг л дээ. Гэхдээ би юу гээд л тэдний бахыг хангахав дээ" гэж байгаамдаа.

Цааш нь “Би юм санаад байдаг хөгийн эр биш л дээ. Яахав хүн бүр намайг гэмтээх гэдэг. Миний эсрэг аль болох л айхтар алдаа хийдэг л дээ. Үүнийг нь би мэддэг. Гол нь би өөрийгөө л хамгаалах ёстой” гэсэн нь түүний үнэхээр плэйоффын хат суусан чанга эр болохыг нь харуулж байна.

Хоёрдахь тоглолт маргааш өглөө болно. Халуухан ч юм болно доо. Вашингтон Кливлендийн талбай дээр нэг хожиж авахгүй бол ноднин, уржнангийнх шиг л юм болох шинжтэйдэг шүү.